పుట్టినరోజుకొక కార్డుముక్క
వారానికొక ఆర్ధ్రత లేని ఈమైలు ముక్క
పెళ్ళిరోజుకొక కేకు ముక్క
సాగుతున్న ఊసులెన్నో -- అర్ధమిచ్చే భాషలేదు
కష్టమొస్తే అమ్మ మాట కరువు
ఇల్లు కొంటే నాన్న నవ్వు కరువు
బిడ్డపుడితే చూడ మామ కరువు
జరుగుతున్న ఘడియలెన్నో -- ఆపగలిగే శక్తిలేదు
తాత పోతే చూడ సెలవు లేదు
చెల్లి పెళ్ళికి వెళ్ళ వీలు కాదు
తడిసెడి నా కళ్ళు రెండే కానీ
ఆగుతున్న గుండెలెన్నో -- కన్నీటి ధారకు అడ్డులేదు
అమ్మ నాన్నను బాగ చూసుకోవాలని
వారి కంటినీరును తుడవాలని
వారి తలను గర్వంతో నిలపాలని
ఎగురుతున్న ఆశలెన్నో -- తీర్చగలిగే మరో దారి లేక
పరులు చెప్పిన మాటవిన్న
దబ్బు ఒక్కటే సత్య మన్న
దేశమొదిలి ఇక్కడొచ్చా
చేతికొచ్చిన డబ్బు తోటి
నే కొన్నదేమిటి? సాధించినదేమిటి?
